ஜன்னலுக்கு வெளியே

புரட்டாசி மாத மழை பெய்து ஓய்ந்துவிட்டிருக்கிறது

நடுப்பகலிலிலும்
வேப்பமர உச்சிக் கொழுந்துகளில்
தேங்கிய சிறு துளிகளின் மேல்
பறக்கும் ரச்மிகள்

வாசலில் கொத்து பரோட்டா சப்தம்

பெருமாள் கோவிலிலிருந்து
திரும்பிவிட்டனர் பலர்

மச்சு வீடுகளில் யாரும் எழுந்திருக்கவில்லை

மச்சு வீடுகளில் யாரோ இருக்கிறார்கள்
மாலை மயங்கிய பிறகே அங்கே யாரோ வருகிறார்கள்
இசையும் குடியுமாக கழிக்கிறார்கள்

நாளுக்கொரு ஏக்கத்தின் புகை வளையமாய்
இருபத்தியேழு விட்டாயிற்று
மச்சு வீடுகளை நோக்கி

அசைந்து கொடுப்பதில்லை
மச்சு வீடுகள்
என் ஜன்னலுக்கு சற்றே வெளியேதான்
இருக்கின்றன அவை

மச்சு வீடுகளில் யாரோ இருக்கிறார்கள்
தனிமையை அழிக்கத் தெரிந்தவர்கள்