புறாவோடு பேசியது குறித்த அரைகுறை அடிக்குறிப்புகள்

சக்தி பீடங்கள் இருக்குமிடமெல்லாம்

புறாக்கள் கூடுமென்று உனக்குத் தெரிந்திருக்கும்

தெரிந்தே இருக்கவேண்டும்

என்றாலும்

தனியே ஒதுங்கி துளசிச் செடிக்கடியில்

பம்மியது எப்படி

இளம் முலைக்கு சிறகு முளைத்தது போல

படபடத்து நிற்கிறாயே 

அவளிதயத் துடிப்பையும் 

காயம்பட்டாலும்

சிறகொடிந்தாலும்

பறந்துதான் தீரவேண்டும்

கூட்டம் கைவிட்டுவிடும் இல்லையெங்கில்

உன் சிறகின் நிழல் என் நிழலில் 

விழுந்தபோதுதான் என் போதையில் 

சிவந்தன உன் கண்கள்

என் மனச் சித்திரம் கலைக்காதே உன் 

நகங்களால் என் கனவின் வழி ஆகாயம் அமைத்துத்

தருவேன் உன் அலுமினிய பட்டி கழற்றி

செய்தி ஏதும் அறியவில்லை உன் குருதி

தோய்ந்த சிறகுகளில்

அறிந்தாலும் அறிவிக்க மனமில்லை

நிழல் தருவோர், நீர் தருவோர்,

நெல் தருவோர், புழு தருவோர்

மாடம் தருவோர், வானம் தருவோர்

உண்டென மயங்காதே

என் குருதியில் மிதக்கும்

நெல் மணிகளைக் கொத்த நீ தயங்காதே

நம் உறவு நேர் இப்போது

என் நரம்புகளின் வழி பறக்கலாம் வா

உன் கறி சுவைக்க ஊறுகிறது உமிழ்